कभर गर्ल

अभिनयबाटै सन्देश 

चलचित्र क्षेत्रमा पृथक् छवि बनाएकी नायिका सुरक्षा पन्तको जन्म बुटवलमा भएको हो । इन्दु र शम्भुनाथ पन्तका पाँच सन्तानमध्ये उनी माहिली हुन् । विद्यालयमा पढ्दाताका उनी वक्तृत्वकला, वादविवाद र खेलकुदमा सक्रिय थिइन् । साथीहरूसँग अत्यन्तै झ्याम्मिन मन पराउने सुरक्षा घरमा हुँदा भने पढेर बस्थिन् । घरबाहिर भने उनी आफूलाई एक्स्प्लोर गर्न रुचाउँथिन् । त्यसैले विभिन्न गतिविधिमा उनी सक्रियताका साथ सहभागी हुन्थिन् । ‘घरभित्र म अत्यन्तै अन्तर्मुखी स्वभावकी थिएँ’ उनले भनिन्, ‘आमा र बुवाले मलाई एकलकाटे भन्नुहुन्थ्यो तर बाहिर साथीहरूसँग हुँदा भने जुझारु देखिन्थें । छुट्टै उत्साह हुन्थ्यो ।’सुरक्षाको शिक्षा–दीक्षा काठमाडौंमा भएको हो । उनले बीई र एमएससीसम्मको शिक्षा ग्रहण गरेकी छन् । उनी काठमाडौं इन्जिनियरिङ कलेजमा तेस्रो वर्षमा पढ्दै गर्दा ‘इमेज भिजे हन्ट’ प्रतिस्पर्धामा सहभागी भई ‘टप थ्री’ मा परेकी थिइन् । त्यहीँ उनलाई जागिरका लागि प्रस्ताव आएको थियो । कलेजकी विद्यार्थी भएकीले उनले जागिर खाइनन् । ‘अडिसनको टेप आलोक नेम्वाङले हेरेपछि मलाई फोन गरी फिल्मको अफर गर्नुभयो । पढाइ सक्नु छ भनेर मैले उक्त प्रस्ताव अस्वीकार गरें’ उनले भनिन्, ‘परीक्षाको अन्तिम दिन एक वर्षपछि फेरि फोन आयो । चलचित्रका लागि प्रस्ताव गर्नुभयो । सानैदेखि नयाँ गर्न चाहने स्वभावका कारण मैले हुन्छ भन्दै फिल्मी करियरमा प्रवेश गरेकी हुँ ।’चलचित्र क्षेत्र नयाँ भएकाले सुरुमा उनी अलमलमा परेकी थिइन् । त्यसैबीच उनलाई फिल्ममा ब्रेक दिने व्यक्तिको निधन भएपछि उनको अन्योलता झनै बढेको थियो । केही समयपछि चलचित्रमा थुप्रै अफर आए पनि उनी आफूलाई अझ निखार्न टेलिभिजनतर्फ लागिन् । ‘न्युज २४’, ‘सगरमाथा’ र ‘कान्तिपुर टिभीमा उनले काम गरिन् । ‘मैले टिभीमा काम गरें, आफूलाई ग्रुमिङ गरें, डेढ वर्ष बितेको पत्तै पाइनँ’ उनले भनिन् । सन् २०१७ मा साम्तेन भुटियाले सुरक्षालाई ‘सुस्केरा’ का लागि अफर गरे । उनले त्यसमा आफूसक्दो राम्रो गर्ने प्रयास गरे पनि त्यो फिल्म रिलिज भएन । उनलाई दीपेन्द्र के. खनालले ‘धनपति’ का लागि अफर गरेपछि उनले पछाडि फर्केर कहिल्यै हेरिनन् । हालसम्म सुरक्षाका आठवटा चलचित्र रिलिज र चार वटा पाइपलाइनमा छन् । ‘के घर, के डेरा’ को सुटिङ केही समयअघि सुरु भएको छ । नौ वटा म्युजिक भिडियो र केही विज्ञापनमा समेत उनले आफ्नो भूमिका राम्ररी निर्वाह गरिसकेकी छन् । हालै राष्ट्रपति विद्यादेवी भण्डारीबाट सर्वोत्कृष्ट अभिनेतृ, राष्ट्रिय पुरस्कार २०७६/७७ प्राप्त गरेकी छन् । समाजसेवामा पनि उनको औधी रुचि छ । उनले भनिन्, ‘पहिला समाजसेवामा निकै केन्द्रित थिएँ, सक्दो सहयोग गर्थें । आर्थिक सहयोग र समय दिएर समाजसेवा गर्थें । पछिल्लो दिनमा समय र परामर्श दिएर सहयोग गर्छु ।’सुरक्षासँग वार्तालापहाल केमा व्यस्त हुनुहुन्छ ?‘के घर, के डेरा’ चलचित्रसहित अन्य सुटिङमा व्यस्त छु । पेसागत रूपमा तपाईं इन्जिनियर हुनुहुन्छ । चलचित्रमा आफ्नो तालमेल कसरी मिलाउनुहुन्छ ?अहिले चलचित्रमै बढी केन्द्रित छु । इन्जिनियरिङको काम गर्न भ्याएकी छैन । चलचित्रमा आउनुको पछाडि कुनै कारण छ कि ?पहिलैदेखि नै अभिनय निकै मनपर्थ्यो । यसका लागि दिनरात खट्न तयार थिएँ । क्रमशः क्यामेरा फ्रेन्डली पनि रहेछु भन्ने लाग्न थाल्यो । कुनै क्षेत्रमा लाग्न भित्रैदेखिको रुचिसँगै लक्ष्य पनि हुनुपर्छ । सुरुदेखि नै म सिनेमाको राम्रो दर्शक पनि हो । फिल्म क्षेत्रमा प्राकृतिक र जीवन्त अभिनय खट्किएझैं लाग्थ्यो । त्यसैलाई मैले मेरो लक्ष्य बनाएँ । प्रकाश सपूतको ‘पीर’ गीतले चर्चासँगै विवादको सामनासमेत गर्नुपर्‍यो । यसबारे तपाईंको भनाइ के छ ?मेरो कलाकारिताको कामले बहस सिर्जना गर्‍यो । कुनै विषयमा सोच्न बाध्य पार्‍यो, मलाई खुसी लागेको छ । प्रगतिशील सोचका लागि विवाद हुनु राम्रो हो, नत्र त समाज एउटै ढर्रामा चलिरहन्छ । स्वस्थ द्वन्द्व मलाई मन पर्छ । तपाईंले आजसम्म निर्वाह गरेको चुनौतीपूर्ण भूमिका के हो ?हरर मुभी ‘घर’को भूमिका चुनौतीपूर्ण थियो । स्टन्टहरू पनि थुप्रै थिए । तपाईले अभिनय गर्दा कस्तो भूमिकालाई प्राथमिकतामा राख्नुहुन्छ ?स्टोरी हेर्छु । स्टोरी मन परेको छ भने मेरो भूमिकालाई पनि दोस्रो स्थानमा राखिदिन्थें । पहिला गरेको भन्दा फरक भूमिका गर्न मन पर्छ । शारीरिक रूपमा चुनौतीपूर्ण भूमिका निर्वाह गर्न मन छ । तपाईंको क्षेत्रमार्फत कसरी महिला सशक्तीकरण र विकासमा योगदान पुर्‍याउन सकिन्छ भन्ने लाग्छ ?धेरै हदसम्म सकिन्छ । मैले छान्ने कथाहरू महिला केन्द्रित भए भने तिनले ठूलो अर्थ राख्छन्, सामाजिक परिवर्तन ल्याउँछन् । ‘आमा’ फिल्मबाटै छोराछोरी बराबरी भन्ने प्रभाव परेको छ समाजमा । नारी केन्द्रित चलचित्र बनाउन थालियो भने त्यसको राम्रै प्रभाव पर्छ । यहाँसम्म आइपुग्दा के कुरालाई आफ्नो उपलब्धि ठान्नुहुन्छ ? के–कस्तो योगदान गरें जस्तो लाग्छ ?जुन धारको सिनेमा म गरिरेहकी छु, पहिला ती धारका चलचित्र हेरिँदैनथ्यो । आर्ट सिनेमा पनि कमर्सियल हुनसक्छ भनेर प्रोत्साहन भइरहेको छ । म जुन सिनेमा छान्छु त्यो विषयवस्तु मान्छेको निकट विषयवस्तु हुँदोरहेछ भन्ने मलाई महसुस भइरहेको छ । दर्शकहरूले आफ्नै कथा हो भन्ने अनुभूति गरेर मन पराइदिएका छन् । म सजग र सचेत नागरिक हुँ, मैले सामाजिक सञ्जाल, सभा–समारोह, विभिन्न कार्यक्रममार्फत जे सन्देश फैलाइरहेकी छु त्यसले समाजमा पारेको प्रभाव र परिवर्तन नै मेरो योगदान र उपलब्धि हो भन्ने लागेको छ । कुनै पनि क्षेत्रमा उचाइको सफलता चुम्न के आवश्यक ठान्नुहुन्छ ?साधना र धैर्य मुख्य कुरा हुन् । एकपटक सफलता प्राप्त भयो भन्दैमा त्यसैमा अल्झिएर बस्नु हुँदैन । यसलाई चटक्क छाडेर फेरि अगाडि बढ्नुपर्छ । तपाईंले कुनै चीजमा खर्चिएको पैसा र समय पछुतो छ ?लुगा र मोबाइलमा खर्च गरेको पैसा र समय अहिले सम्झिँदा बेक्कार गरिएछ भन्ने लाग्छ ।कुनै पुस्तकको एउटा पात्र भेटेमा ऊसँग के विषयमा केन्द्रित भई वार्तालाप गर्नुहुन्छ ?‘शिरीषको फूल’ को सकम्बरी पात्रसँग भेटेर नारी भावनाबारे कुरा गर्न मन छ । ‘बेस्ट फ्रेन्ड’ बन्ने मन छ । यात्रामा सँगै जाने मन छ । तपाईका आगामी योजना के छन् ?केही समय अभिनयमै केन्द्रित हुनेछु । अभिनय गरेरै जीवन निर्वाह गर्न सकिन्छ भन्ने सन्देश दिन चाहन्छु । इन्जिनियरिङलाई कला क्षेत्रमै मर्ज गर्न पनि सक्छु । मैले कथा लेखें वा चलचित्र बनाएँ भने मेरो डिजाइनमा आर्ट पनि देखिनेछ । 

लक्ष्मी भण्डारी, जेष्ठ ४, २०७९

-- पुरै पढ्नुहोस् --

मातृत्व अनुभूति

यो संसारमा सबैभन्दा सजिलो र अनमोल शब्द हो–आमा । आमा शब्दलाई कुनै परिभाषाको आवश्यकता पर्दैन । किनभने यो शब्दमा अनुभूति समाहित छ । आमा प्रेम, त्याग र सेवाकी प्रतिमूर्ति हुन्, ईश्वरकी प्रतिरूप पनि हुन् ।

लक्ष्मी भण्डारी, वैशाख १६, २०७९

-- पुरै पढ्नुहोस् --

नम्र नम्रता 

आगामी तयारी भनेको कसरी उत्कृष्ट प्रस्तुति दिने भन्ने नै हो । त्यसका लागि म आफूलाई मानसिक, शारीरिक र बौद्धिक रूपमा तम्तयार अवस्थामा रहने गरी आवश्यक कार्यहरू गरिरहेकी छु ।

 लक्ष्मी भण्डारी, चैत्र ४, २०७८

-- पुरै पढ्नुहोस् --

विवाहिताको सफल यात्रा 

महिलामाथि हुने हरेक प्रकारका हिंसा अन्त्यका लागि बलियो कानुन बनाउनुपर्छ । महिला स्वयं अब आवाज उठाउन सक्ने हुनुपर्छ ।

नारी संवाददाता , फाल्गुन ३, २०७८

-- पुरै पढ्नुहोस् --

स्पष्टवक्ता नम्रता

नम्रता श्रेष्ठ नेपाली चलचित्र क्षेत्रमा सम्भावना बोकेकी अभिनेतृ हुन् । दर्जनौं ‘र्‍याम्प शो’ मा मोडलिङ गर्दै चलचित्रमा प्रवेश गरेकी उनले ‘रुदाने’, ‘आस्था’, ‘गाँठो’, ‘जानी–नजानी’, ‘माछा–माछा’ आदि चलचित्रमा अभिनय गरिसकेकी छन् ।

 लक्ष्मी भण्डारी, माघ १३, २०७८

-- पुरै पढ्नुहोस् --

नेपाली ब्रान्ड फैलाउने विदुषी 

शिक्षा पहिलो सर्त हो । त्यसपछि धैर्य, आफ्नो सपनामाथिको विश्वास र दृढताका साथै रिस्क लिन सक्ने क्षमता महिलामा हुनुपर्छ।

 लक्ष्मी भण्डारी, पुस ४, २०७८

-- पुरै पढ्नुहोस् --

‘मिस युनिभर्स’ सुजिता 

आफ्नो सपना साकार पार्नका लागि गर्नुपर्ने कसरतमा कहिल्यै हरेस खान हुँदैन । एक–दुईपटक असफल भइयो भन्दैमा प्रयास गर्न छोड्नु हुँदैन ।

 लक्ष्मी भण्डारी, मंसिर ६, २०७८

-- पुरै पढ्नुहोस् --

सुर–सेवाको संगम: त्रिशाला

आफैंमा विश्वास गरौं । असल बन्न सिकौं । युवाका लागि अभिभावकलाई सुन्ने र उनीहरूलाई माया  र सम्मान गर्नुपर्छ भन्न चाहन्छु । तिहारको सबैमा शुभकामना ।

लक्ष्मी भण्डारी, कार्तिक ८, २०७८

-- पुरै पढ्नुहोस् --

रेश्मा रहर

पछिल्लो समय अभिनयमा रमाइरहेकी रेश्मा नर्सिङ पेसालाई सँगसँगै लैजाने बताउँछिन् । नर्स, मोडल, टिकटकर, नायिका तथा ‘नेपाल आइडल’ को कार्यक्रम सञ्चालिका समेत रहेकी उनले धेरै विकल्प नभए नेपालमा टिकिरहन गाह्रो हुने अनुभव सुनाइन् ।

लक्ष्मी भण्डारी, आश्विन ५, २०७८

-- पुरै पढ्नुहोस् --

रेखाको रहस्य

लगातार दुई दशक एकनासले उस्तै । गति र लोकप्रियताको ‘पोजिसन’ पनि उही । आफ्नो यो रहस्य÷राज खोल्दै नायिका रेखा थापाले भनिन्, ‘हरेक क्षेत्रमा अध्ययन र अभ्यास फरक–फरक हुन्छन् । जमिन छाडेर उड्ने मान्छे म पक्कै होइन । मान्छे हुनुको धर्ममा विश्वास गर्छु । कर्मक्षेत्रको आस्थामा भरोसा गर्छु र सोहीअनुसार हरेक काममा उत्कृष्ट प्रदर्शन गर्ने सक्दो प्रयासमा हुन्छु ।

लक्ष्मी भण्डारी, भाद्र २, २०७८

-- पुरै पढ्नुहोस् --

जाँगरिली गरिमा

स्नातक तहमा अध्ययनरत गरिमाले अभिनय गरेको भुर–भुर पुतलीको टिमले नबोली नबोली...का प्रस्ताव गरे, त्यही गीतले उनलाई हिट बनाइदियो । त्यसयता उनले पछाडि फर्केर हेर्नुपरेको छैन । पुष्प खड्का, पल शाहलगायतका चल्तीका हिरोसँग म्युजिक भिडियोमा अभिनय गरिसकेकी गरिमाको अबको इच्छा ठूलोपर्दाको चलचित्रमा अभिनय गर्ने हो ।

लक्ष्मी भण्डारी, श्रावण ४, २०७८

-- पुरै पढ्नुहोस् --