नारी संवाददाता

मंसिर २३, २०७५  

बर्दियाको बढैयाताल गाउँपालिकाले ९९ जना महिला स्वास्थ्य स्वयंसेविकालाई साईकल बितरण गरेको छ । गाउँपालिकाले १५ औँ महिला स्वास्थ्य स्वयंसेविका दिवसको अवसर पारेर साईकल वितरण गरेको हो ।

निस्वार्थ सेवामा लागेका स्वास्थ्य स्वयंसेविकाहरुको मनोबल बढाउनुका साथै उनीहरुलाई थप हौसला प्रदान गर्न साईकल वितरण गरिएको बताइएको हो । 

यस्तै गाउँपालिकाका ९ वटै वडाका १/१ जना उत्कृष्ट काम गर्ने स्वयंसेविकाहरुलाई नगद २ हजारसहित सम्मान गरिएको छ ।

कार्यक्रमलाई सम्बोधन गर्दै गाउँपालिकाका अध्यक्ष लालबहादुर श्रेष्ठले महिला स्वयंसेविकाहरुको कामको प्रसंसा गर्दै अवकास हुँदा नेपाल सरकारबाट पाउने २० हजारलाई गाउँपालिकाले २० हजार थप गरी ४० हजार बनाउने घोषणा गरे ।

उनले अहिले नेपाल सरकारले दिँदै आएको मासिक ४ सयलाई बढाएर १ हजार बनाउने र थप प्रोत्साहन स्वरुप गाउँपालिकाले भ्रणणको लागि १ लाख बजेट छुट्याईने समेत बताए ।