मनोज पौडेल

असार १२, २०७९ कोरोनाको डर हटेपछि बुद्धजयन्ती मनाउन लुम्बिनीमा ठूलो भीड लाग्यो । भारतीय प्रधानमन्त्री नरेन्द्र मोदी आउने भएपछि झनै उल्लास थपियो । यो वर्षको २५६६ औं बुद्धजयन्ती मनाउन लुम्बिनीमा भिक्षु, लामागुरु र उपासक–उपासिकाहरूको पनि बाक्लै उपस्थिति रह्यो । त्यही समूहमा गुरुमा, आनी र ऋषिनीहरूसमेत मिसिए । 

बुद्धको जन्म, मृत्यु, ज्ञान प्राप्ति एकै दिन वैशाख पूर्णिमामा भएकाले अनुयायी गुरुमा, आनी र ऋषिनी बुद्धजयन्ती मनाउनसक्रिय हुन्छन् । यो वर्ष तीन दिनसम्म मनाइएको बुद्धजयन्तीमा बिहानदेखि साँझसम्म उनीहरूको व्यस्तता थियो । 

‘दुई वर्ष देशव्यापी निषेधाज्ञाका कारण बुद्धजयन्ती मनाउन पाइएन,’ अन्तर्राष्ट्रिय गौतमी भिक्षुणी विहार प्रमुख खमेसी गुरुमाले भनिन्, ‘यस पटक खुला वातावरणमा बुद्धजयन्ती मनाएर पुण्य संचय गर्‍यौं । शान्तिभूमिबाट संसारभर भाइरस संक्रमण छिटो समाप्त होस् भनेर कामना पनि गर्‍यौं ।’ 

बुद्धजयन्तीका दिन मायादेवी मन्दिरमा थेरवादी र महायानी परम्पराअनुसार मंगल कामना गरियो । बेलुका पुष्करणी पोखरीमा २५६६ वटा दीप प्रज्ज्वलन गरिएको थियो । दिउँसो भारतीय प्रधानमन्त्री मोदीले मायादेवी मन्दिरमा पूजाआजा र दीप प्रज्ज्वलन गरेका थिए । त्यहीँ उनले रोप्न पठाएको बोधी वृक्षमा पानी हालेका थिए । साँझ मायादेवी मन्दिर र पुष्करणी पोखरीमा दीपावली गरिएको थियो ।

- तस्बिरः मनोज पौडेल